Tundra Electro
Sämmilâš jyeigee já lávloo Ingá-Máret Gaup-Juuso já taažâ musikkár já šuoŋârähtee Patrick Shaw Iversen vuáđudáin Tundra Electro ive 2017. Suoi láin kuittâg algâttâm ohtsâšpargo jo ive 2007 projektijn, moi ooleest suoi juuđijn Indiast, Nepalist já Bangladeshist.
Tundra Electrost musikkárkyevtis lává tuoijum áinoošlajâsii jienâ, mii ovtâstit ärbivuáválii sämmilii lávlumvyevi elektrovnlijn muusikáin, improvisaatiomuusikáin já indialii klassissii muusik elementijguin. Muusik lii ráhtám Iversen, já lávlum lii ovtâstittum tovláin, paijeel 100 ihheed puáris luođijn sehe Gaup-Juuso uđđâ luođijn já teevstâin.
Patrick Shaw Iversen já Inga-Máret Gaup-Juuso lasseen Tundra Electro lávdástemjuávhust suáittiv vivluvirtuoos Harpreet Bansal sehe perkussionist Rune Arnesen.
Bansal vuossâmuš sooloskiärru lâi iävtukkâssân ”Taažâ Grammy”, Spelleman-palhâšume finnejeijen já Arnesen vuod lii paijeel 40 ive karrieer ääigi čuojâttâm paijeel 470 albumist.
Deebyytskiärus, Eanan Gamáda – Earth Shaking, Tundra Electro almostitij ive 2020 já sii uđđâsumos album, Hálde áhkku – Mountain of Ancestors, almostui roovvâdmáánust 2023. Ijâttes ijjâ lii vuossâmuš festivaal, mast muusikjuávhu puáhtá kuullâđ uđđâ skiäru almostittem maŋa.
Kove: Anna-Julia Granberg / Blunderbuss
Puoh artisteh