Ijâttes ijjâ 2024 -festivaal ohjelm lii almostittum
Ijâttes ijjâ -algâaalmugij muusikfestivaal ohjelm lii almostittum onne. Festivaal uárnejuvvoo Anarist porgemáánu 16.-17. peeivi já tot áávvud 20 ive historjás. Festivaaloholoopân kuleh konsertij lasseen kietâtyejimarkkâneh, njuárustemkišto, Ijâttes ijjâ 20 ihheed -seminaar, Talent Stage sehe párnái já nuorâi ohjelm.
Tábáhtus álgá vástuppeeivi 16.8. párnái já nuorâi ohjelmijn. Peeivi ääigi párnááh já nuorah, kiäh láá almottâttâm muuneeld, uásálisteh pargopáájáid já eres ohjelmân sehe peesih čäittiđ jieijâs tááiđuid Násttážat-konsertist.
Festivaal liäkkoo vástuppeeivi tme 17.30, mutâ jo tuorâstuv lii máhđulâš algâttiđ oholoopâ Ijâttes ijjâ -algâtuáloin, Wilderness Hotel Juutuast Yungmiquin. Algâtuáluid uárnee Wilderness Hotel Juutua já toho lii nuuvtá siisâpeessâm.
Vástuppeeivi konsertijd festivaalkuávlust aalgât Ravggon, kote almostitij uđđâ album kiđđuv. Čuávuvâžžân lii vuárust meid uđđâ album almostittám artist, Ánnámáret, kote láávdást Saijoos auditoriost. Vástuppeeivi olgoáimukonserteh juátkojeh vissásávt liävttoin, ko läävdi oolâ puátih Tundra Electro, Lávre já Kevin Boine.
Lávurduv 17.8. festivaalkuávlu lekkâs tme 14.00, mutâ jo ovdil tom lii Säämimuseo já luándukuávdáš Siidast sehe Ijâttes ijjâ 20 ihheed -seminaar já Ánnámáret soolokonsert. Vuossâmuš konsert festivaalkuávlust lii Saijoos auditoriost, kost lii Jalvvi Niillas Luođik -jienâtyeje almostittemkonsert. Olgoläävdi ohjelm aalgât Talent Stage, mast läävdi oolâ peesih uđđâ artisteh, kiäh iä vala lah ennuv lamaš uáinusist.
Ijâttes iijâst láávdást lávurduv meid Ed Littlefield, kote lii meddâl Sitkast, Alaskast. Ärbivuáválii sämimuusik Ijâttes iijâ läävdi oolâ pyehtih Anna Lumikivi, Nils-Heikki Paltto já Lars Heaika Blind. Konsertij kooskâst festivaalkyesih pyehtih uásálistiđ njuárustemkiišton. Tärkkivuođâ vättee kišto uárnejuvvoo Saijoos šiljoost. Lávurduv konsertohjelm looppât kievrâ kuulmâs, ko läävdi oolâ puátih maŋaluvâi Mari Boine, DJ Ailo & DJ iDJa sehe Ailu x Amoc & Trio Boogiemen.
Ive 2024 Ijâttes iijâ poster lii vuávám taaiđâr Ellen-Maarit Juuso.
Ijâttes ijjâ 16.–17.8.2024 Anarist. Liipui munevyebdim álgá tuorâstuv 4.7.2024. Muneliipuid puáhtá uástiđ čujottâsâst lippu.fi sehe Lippupiste toimâsoojijn. Rävisulmui oles oholoopâ muneliipu hadde lii 65€ já párnái (7-15i) oholoopâ munelippu lii 20€. Muuneeld ostum rävisulmui peiviliipu hadde lii 34,99€ já párnái munepeivilippu lii 9,99€. Lippu.fi -siijđost haadan lasettuvvoo lippu.fi palvâlemmáksu já toimâttâsmáksu.
Siisâ puáđidijn rävisulmui oles oholoopâ liipu hadde lii 80€ já párnái oholoopâ lippu lii 25€, rävisulmui peiviliipu hadde siisâ puáđidijn lii 45€ já párnái peivilippu 15€. Vuálá 7-ihásiih peesih siisâ nuuvtá.
Mij avžuuttep, ete ulmuuh uástih liipuid muuneeld já kevttih koortâ, jis uástih liipu siisâ puáđidijn. Meid kietâruđâiguin puáhtá mäksiđ siisâ puáđidijn.
Puoh Ijâttes iijâ festivaalkietâpadijguin piäsá nuuvtá Säämimuseo já Luándukuávdáš Siida čáitálduvváid oles festivaaloholoopâ ääigi (vástuppeeivist pasepeeivi räi).
Ijâttes iijâ uárnejeh Anára Sámisearvi ry., Sämitigge, Säämi kulttuurkuávdáš Sajos, Säämi máttááttâskuávdáš já Säämimuseo já luándukuávdáš Siida. Festivaal oovtâstpargokyeimi lii Wilderness Hotel Juutua.
Lasetiäđuh:
Išepyevtitteijee
Aleksi Ahlakorpi
+358 44 901 4950
aleksi.ahlakorpi(át)samediggi.fi