Ijâttes ijjâ -festivaal ohjelm lii almostittum

Porgemáánust ornimnáál Ijâttes ijjâ -algâaalmugij muusikfestivaal ohjelm lii almostittum. Festivaal uárnejuvvoo Anarist jo oovcenubálovváád keerdi. Festivaaloholoopâst láá fálusist konsertij lasseen Ijâttes ijjâ -kärbismokke, njuárustemkišto, Talent Stage, sämityejimarkkâneh sehe párnái já nuorâi jieijâs ohjelm.

Tábáhtus álgá vástuppeeivi 19.8. párnái já nuorâi peivijn. Peeivi ääigi muuneeld almottâttâm párnááh já nuorah uásálisteh pargopáájáid sehe peesih uáiniđ sämmilijd uánihisfiilmâid. Jieijâs naavcâid párnááh já nuorah peesih čäittiđ Násttážat-nuorâikonsertist.

Festivaal liäkkoo vástuppeeivi tme 18.00, mutâ jo tađe ovdil lii máhđulâš vyelgiđ Ijâttes ijjâ -kärbismookán Aanaarjäävri oolâ. Määđhi uárnee Visit Inari já määđhi ääigi láávdást Ailu Valle. Kärbismookán vyebdih liipuid sierâ.

Vástuppeeivi konsertijd Ijâttes ijjâ festivaalkuávlust aalgât Emil Kárlsen, kii lii almostittâm vuossâmuu skiärus taan ive. Suu maŋa vuárust lii ohtâ taan tove pivnohumos sämiartist, ISÁK. Vástuppeeivi konserteh noheh vissásávt liävttoin, ko läävdi oolâ puátih Bernt Mikkel Haglund já jyeigeeh.

Lávurduv 20.8. festivaalkuávlu lekkâs tme 15.00. Vuossâmuš konsert lii Talent Stage já läävdi oolâ peesih artisteh, kiäh iä lah vala ennuv lamaš uáinusist iäge stuorrâ aalmug tiäđust.

Ijâttes iijâ läävdi alne lii lávurduv meid Evvan nõmmpeeiʼv (Evvan nommâpeeivih), mii lii aaibâs uđđâ nuorttâlâš muusikjuávkku, mon vuossâmuš lávdástem lii ive 2022 Ijâttes iijâst. Ärbivuáválii sämmilii muusik läävdi oolâ pyehtih pelestis Ulla Pirttijärvi-Länsman, Semmen Bolshunov já Petter Morottaja. Konsertij paaldâst festivaalkyesih pyehtih uásálistiđ njuárustemkiišton. Tärkkivuođâ vättee kišto uárnejuvvoo Saijoos šiljoost. Lávurduv konserteh noheh korrâ kulmâsân, ko läävdi oolâ puátih maŋaluvâi Arvvas, Angelit já Intrigue.

Ive 2022 Ijâttes iijâ poster lii vuávám njuárgámlâš taaiđâr Lada Suomenrinne.

Ijâttes ijjâ 19.–20.8.2022 Anarist. Muneliipui vyebdim álgá ohhoost 28. 

Ijâttes iijâ uárnejeh Anára Sámisearvi rs, Sämitigge, Säämi kulttuurkuávdáš Sajos, Säämi máttááttâskuávdáš, Aanaar kieldâ já Yle Säämi. Festivaal oovtâstpargokyeimih láá Visit Inari já Hotelli Kultahovi.

Lasetiäđuh:

Pyevtitteijee
Oula Guttorm
oula.guttorm(at)samediggi.fi
+358 40 667 4545

Išepyevtitteijee
Aleksi Ahlakorpi
aleksi.ahlakorpi(at)samediggi.fi
+358 40 192 8468