Ijahis idja -konseartasáddaga sáhttá čuovvut nuvttá

Ijahis idja -eamiálbmogiid musihkkafestivála konsearta rávdnjejuvvo njuolggosáttan 15.8.2020 dmu 19.00 rájes Anáris, sámekulturguovddáš Sajosis. Konseartasáddaga sáhttá čuovvut nuvttá, konseartabáikái eai váldojuvvo olbmot. Sáddaga sáhttá čuovvut čujuhusas www.sajos.fi/live.

Ijahis idja Suoma Giehtaruohttasa duoddariid beales

Giehtaruohttasa guovlu lea dál ruvkeindustriija fidnuid čuozáhahkan. Ruvkedoaimmain livčče bissetmeahttun vahátlaš čuovvumušat Giehtaruohttasa duottarguovllu rašes lundui ja elliide. Guovllu eallinfápmu vuođđuduvvá luonddu suvdilis geavaheapmái, dego luondduealáhusaide, luondduturismii ja virkkosmahttingeavahussii. Ruvkedoaimmas leat duššadeaddji váikkuhusat buhtes čáziide, elliide ja eatnamiidda. Ijahis idja -festivála háliida čájehit iežas doarjaga Giehtaruohttasa guovllu árbevirolaš geavaheaddjiide ja dadjat ovttas ii fal ruvkedoaimmaide Sámis. Temákonsearttas juiget Iŋgá-Máret Gaup-Juuso ja Juha Tornensis. Dasa lassin gullat olbmuid, geat barget árbevirolaš ealáhusaiguin guovllus.

Ailu Valle ja Gájanas-joavku fállet modeardna sámemusihka

Ailu Valle lea rap-artista, guhte loaiddasta davvisámegillii, suomagillii ja eaŋgalasgillii. Su stiillas ovttastuvvet servodatlaš bealiváldin, teknihkalašvuohta ja dovdu. Ailu Valle almmustahtii goalmmát studioálbuma ”Viidon sieiddit” 27.7.2019. Ijahis idja -konsearttas Ailu Valle mielde leat DJ Uyarakq sihke dánsut Janita Rantanen ja Niina Rajaniemi.

Gájanas-musihkkajoavku čuojaha sámegielat etno-proge-musihka. Ohcejot-anárlaš joavku lea earret eará válljejuvvon beakkán Kaustinen-álbmotmusihkkafestivála jagi musihkkajoavkun 2017. Joavkku musihkas skádja sápmelaš árbevierru, mii gávnnada dálááiggiin ja buvttada ivdnás loahppabohtosa.

Festivála šluhttejuvvui koronaviruspandemiija dihte

Aitosaš festivála šluhttema birra almmuhuvvui juo miessemánus daláš COVID-19 dili dihte. Lágideddjiid oainnu mielde riikkaidgaskasaš álbmotdáhpáhusa livččii leamaš veadjemeahttun lágidit dorvvolaččat borgemánu beallemuttus. Dáláš dilli lea čájehan, ahte mearrádus lei riekta.

Ijahis idja -konsearta njuolggosáttan lávvardaga 15.8. dmu 19.00 rájes čujuhusas www.sajos.fi/live. Konseartta lágidit ovttasbarggus Ijahis idja -festivála, Anára Sámisearvi rs, Suoma Sámedikki sámemusihkkaguovddáš, sámekulturguovddáš Sajos ja Sámi oahpahusguovddáža medialinnjá.

Lassedieđut:
Buvttadeaddji Oula Guttorm
+358 40 667 4545
oula.guttorm(at)samediggi.fi
www.ijahisidja.fi
www.sajos.fi/live