Ijahis ija prográmma lea almmustahtton

Ijahis idja – eamiálbmogiid musihkkafestivála prográmma lea almmustahtton otne. Festivála ordnejuvvo Anáris borgemánu 14. beaivvi. Dán jagaš Ijahis idja lea ovtta beaivásaš, muhto nugo ovdalge, prográmma lea viiddis ja máŋggabealat. Festiválavahkkolohppii gullet konsearttaid lassin earret eará sámi valástallangilvvut, duodjemárkanat,
mánáid ja nuoraid prográmma ja dán jagi ođasvuohtan pop up -bargobájit.

Festiválaguovlu rahpasa lávvardaga 14.8. dii 14.00. Seammas rahpasit maiddai Ijahis ija duodjemárkanat, main leat vuovdimassii duojit birra Sámi. Nuoraidkonsearttas fállet guldaleddjiide Sámi musihka garrasamos ođasvuođaid, go lávddi ala bohtet earret eará Láhppon ja Sámenuoraid dáiddadáhpáhusas oahpis Kootkmiõhtt! Njoarostangilvvus, man lágida Anára Sámisearvi, oassálastit besset iskat suohpangieđaset Sajosa šiljus.

Jos njoarosteami háliida hárjehallat ovdal gilvvu dahje muđui beare oahpasmuvvat njoarosteapmai, njoarosteami álgooahppu -bargobájis lea vejolaš gazzat oahpu. Maiddai mánáide ja nuoraide leat bargobájit ja
festiválaguovllus lea vejolaš maiddai málet graffiti ovttas Sámi Hustleriin.

Eahketkonsearttaid festiválaguovllus rahpa U´lljan & Saauj Cool Band, man vuosttas skearru almmustuvai geasit 2020. Ozas ja Yungmiqu leat maiddai vuosttas háve Ijahis ija váldolávddis. Árbevirolaš luohti maid gullo, go lávddi ala bohtet Niiles-Jouni Aikio, Bigga Aikio ja Laura Tapiola. Eahkeda maŋimuš artisttat lea Sámi stuorra násttit, Jon Henrik Fjällgren sihke sámegielat ráp jiehtanasat, Ailu Valle ja Amoc, geat almmostahttiba oktasaš skearru dán jagi. Ailuin ja Amociin čuojaha Trio Boogiemen.

Festivála dieđiha bileahttavuovdimis sierra. Bileahtaid vuvdet sihke ovddalgihtii ja uvssas.

Ijahis ija ordnejit ovttas Anára Sámisearvi ry, Sámediggi, Sámekulturguovddaš Sajos, Sámi oahpahusguovddaš ja Anár gielda.

Lassediehtu:

Buvttadeaddji
Oula Guttorm
oula.guttorm@samediggi.fi
+358 40 667 4545

Veahkkebuvttadeaddji
Aleksi Ahlakorpi
aleksi.ahlakorpi@samediggi.fi
+358 40 526 3363