Iinnteʹmes inn-konseʹrttvuõlttõõzz vuäitt ǩiõččâd määusteʹmen

Iinnteʹmes inn- alggmeerai musikkfestivaal konseeʹrt striiʹmjet 15.8.2020 čiâss 19.00 ääʹljeeʹl Aanrest sääʹmkulttuurkõõskõs Sajoozzâst. Konseʹrttvuõlttõõzz ǩiõččmõš lij määustem, pääiʹǩ õõl ǩiõččjid jeät valddu. Vuõlttõõzz vuäitt ǩiõččâd addrõõzzâst www.sajos.fi/live.

Iinnteʹmes inn Lääʹdd Ǩiõttmaddi jõnn tuõddri beäʹlest

Ǩiõttmaddi vuuʹdest lie jååʹttmen mäŋgg kuäivas-sueʹrj haʹŋǩǩõõzz. Kuäivastooiʹmin leʹčči loopplaž seuʹrrjõõzz Ǩiõttmaddi rââʹžžes luõttu di žeeʹvetkådda. Vuuʹd jieʹllemviõǥǥ vuâđđan lij luâđ ǩeâllʼjeei âânnmõš, mâʹte luâttjieʹllemvueʹjj, luâttmaatkčummuš da virksmâʹttemâânnmõš. Kuäivastooiʹmin lie peʹllsteei vaaiktõõzz puuʹttes čaaʹʒʒid, jieʹllʼjid da maddu. Iinnteʹmes inn- festivaal haaʹlad čuäʹjted tueʹrjes Ǩiõttmaddi vuuʹd õõʹnnʼjid da ceäʹlǩǩed õõutveäkka ij kuäivastoimma Sääʹmjânnmest. Teeʹmmkonseeʹrtest juõiggje Iŋgá-Máret Gaup-Juuso da Juha Tornensis. Jiõʹnne peäʹsse veâl vuuʹd äʹrbbvuõđlaž jieʹllemvuõʹjji harjjteei.

Ailu Valle da Gájanas-joukk taʹrjjee modeʹrn sääʹm-musiikk

Ailu Valle lij tâʹvvsäämas, lääddas da eŋglõsǩiõʹlle räʹppjeei artistt, koon nääʹlest õhttan bieʹllvaʹlddi saakk, teeknlažvuõtt da tobdd. Valle õlmstõõʹtti kuälmad studioalbuumes “Viidon sieiddit” leʹbe “Laajentuneet Seidat” 27.7.2019. Iinnteʹmes inn -konseeʹrtest Ailu Valle mieʹldd lie DJ Uyarakq di taʹnssjeei Janita Rantanen da Niina Rajaniemi.
Gájanas lij sääʹmǩiõllsaž etno-proge-musikkjoukk Lääʹdd laaǥǥâst,Uccjokk-Aanar akseeʹlest. Joouk musiikkâst šäigg sääʹm äʹrbbvuõtt, kååʹtt kaaunââtt ânnʼjõžaaiʹjin euʹnnreeʹǧǧes suddõõttmõššân.

Festivaal ij šõddâm koronaviruspandemia diõtt

Jiõčč festivaal jårrâʹsttmest iʹlmmteš juʹn vueʹssmannust tõn äiggsaž COVID-19 -vueʹjj diõtt. Jäʹrjsteei ǩiõʹčče, što meeraikõskksaž šõddmõõžž jäʹrjstummuš staanâld påʹrǧǧmannu beäʹl rääʹjest leʹčči vueiʹtʼteʹmes päiʹǩǩ. Ânnʼjõž vueʹjjest ǩiõččeeʹl tuʹmmstõk lij mõõnnâm vuõiʹǧǧest.

Iinnteʹmes inn -konseʹrtt sriiʹmjum sueʹvet 15.8. čiâss 19.00 ääʹljeeʹl addrõõzzâst www.sajos.fi/live. Konseeʹrt jäʹrjste õõutveäkka Anára Sámisearvi rõ, Lääʹdd Sääʹmteeʹǧǧ, sääʹm-musikk-kõõskõs, Sääʹmkultturkõõskõs Sajos da Sääʹm škooultemkõõskõõzz medialinjj.

Lââʹssteâđ:
Puuʹtʼteei Oula Guttorm
+358 40 667 4545
oula.guttorm(at)samediggi.fi
www.ijahisidja.fi
www.sajos.fi/live