Ijahis idja -festivaal ohjjelm lij čõõđtum

Påʹrǧǧmannust jäʹrjstem Ijahis idja -alggmeerai musikkfestivaal ohjjelm lij čõõđtum. Festivaal jäʹrjste Aanrest juʹn 19. vuâra. Festivaalneäʹttel-loopp taʹrjjõsse koʹlle konseeʹrti paaldâst Ijahis idja -võõnâsreiss, čâustõknjuärstemǩeâštt,  Talent Stage, sääʹmǩiõtt-tuâjjmarkkân de päärnai da nuõri jiijjâs ohjjelm.  

Noorõõttmõš älgg piâtnâc 19.8. päärnai- da nuõripeeiʹvin. Peeiʹv poodd õuddlest iʹlmmtõõttâm päärna da nuõr vuässâʹtte tuâjjpõõrtid de peäʹsse vueiʹnned säʹmmlaid vuäʹnkõsjieʹllikaartid. Jiijjâz silttõõzz päärna da nuõr peäʹsse čuäjtõõllâd Násttážat-nuõrikonseeʹrtest.     

Festivaal ääʹvee piâtnâc čiâss 18.00, leša juʹn ouddâl tõn lij vueiʹtlvažvuõtt vueʹlǧǧed Ijahis idja -võõnâsrijssu Aanarjäurra. Määʹtǩ jääʹrjast Visit Inari da määʹtǩ poodd čuäjtââtt Ailu Valle. Võõnâsrijssu âlgg vuäʹstted jeeʹrab lipp.

Piâtnâc konseeʹrt Ijahis idja festivaalpääiʹǩest alttad tän eeʹjj vuõssjiõntõõzz čõõđtam Emil Kárlsen. Suu mâŋŋa vuârast lij õhtt tän šiâtt siâssjummsin sääʹmmartiistin, ISÁK. Piâtnâc konseeʹrt poʹtte aainâs hooddsõõžžin tobdlmin, ǥu čuäjtõõttâmkriʹlcce võʹllai Bernt Mikkel Haglund da juõiǥ.

Sueʹvet 20.8. festivaal ävvam čiâss 15.00. Vuõssmõs konseʹrtt lij Talent Stage, koʹst čuäjtõõttâmkriʹlcce peäʹsse artiist, kook jeäʹla veâl leämmaš jõnn narood õõudâst  jiâ-ka teâđast.    

Ijahis idja čuäjtõõttâmkriiʹlcest čuäjtâʹtte še Evvan nõmmpeeiʹv (Jussin nimipäivät), kååʹtt lij veäđaž nuõrttsäʹmmlaž bäʹndd, koon vuõssčuäjtõõttmõš lij eeʹjj 2022 Ijahis idjast. Äʹrbbvuõđla musiikk kriʹlcce poʹhtte peäʹlstes Ulla Pirttijärvi-Länsman, Semmen Bolshunov da Petter Morottaja. Konseeʹrti paaldâst  festivaalkuõʹssin lij vueiʹtlvažvuõtt vuässõõttâd čâustõknjuärstemǩiõšttu. Tääʹrǩesvuõđ õõlǥteei ǩeâštt jäʹrjste Sajos šeelljast. Sueʹvet konseeʹrt poʹtte kõõrâs kolmmõʹǩǩe, ǥu kriʹlcce võʹllʼje ǩeäččlõõžži Arvvas, Aŋŋel da Intrigue.    

Eeʹjj 2022 Ijahis idja plakaatt lij plaanääm Nuorgaamlaž čeäppšeǩ Lada Suomenrinne.

Ijahis idja 19.–20.8.2022 Aanrest. Ouddlippkaaupšummuš älgg 28. neäʹttlest.  

Ijahis idja  jäʹrjsteei Anára Sámisearvi ry, Sääʹmteʹǧǧ , Sääʹmkulttuurkõõskõs Sajos, Sääʹmvuuʹd škooultemkõõskõs, Aanar kåʹdd da Yle Sápmi. Festivaal õhttsažtuâjjneeʹǩǩ liâ Visit Inari da Hotel Kultahovi.

Lââʹssteâđaid:
Puuʹtʼteei
Oula Guttorm
oula.guttorm(at)samediggi.fi
+358 40 667 4545

Veäʹǩǩpuuʹtʼteei
Aleksi Ahlakorpi
aleksi.ahlakorpi(at)samediggi.fi
+358 40 192 8468